Bankivik landedirektørimik nutaamik atorfinitsitsivoq
Bankiviup Anne Nivíka Grødem landedirektøritut atorfinitsippaa, 2026-mi augustip 1-iani aallartissaaq. Atorfinitsitsineq Bankiviup inuiaqatigiinnut qaninnerusumik najukkamiinnerusumillu periuseqarusunneranut nunatsinnilu niuerfimmi ineriartornerminik ingerlatitsiinnarusunneranut attuumassuteqarluinnarpoq.
Anne Nivíka Grødem Visit Greenlandimi pisortaanertut sulisimavoq, tassanilu 2022-mili takornariaqartitsinerup Nuummi inuiaqatigiinnut qaninnerusumik periuseqarnissaa sulissutigisimallugu. Bankimi ilinniarsimasuuvoq siornatigullu aningaaserivimmi sulinermik misilittagaqarluni. Aammattaaq Sermersooq Businessimi pisortamut tullersortaanikuuvoq, ukiorpassuarnilu namminersortutut suliniutinilu aqutsisutut misilittagaqarluni. Bankiviup Nunatsinni aqutsisui augustip 1-ianit tassaalissapput Anne Nivíka Grødem, landedirektør, Pia Holm Jensen, privatkundedirektør, kiisalu Johanne Nive Mikkelsen, erhvervsdirektør.
“Anne Nivíka Grødemip Bankivimmut tikilluaqqunissaa assorsuaq nuannaarutigaarput. Anne Nivíka Kalaallit Nunaanni inuussutissarsiortut atugaannik ilisimannilluartuuvoq siuttuunerlu misilittagaqarfigilluarlugu. Pikkoriffiit taakku bankip piujuartitsineq pingaartillugu ineriartortitsineranut inuiaqatigiinnullu qaninnerusumik periuseqarneranut nukittorsaataasussaapput,” Brian Smedemark, Bankivimmi forretningsdirektøri oqarpoq.
Bankiviup Savalimmiut sorlaqarfigaa, maannalu aamma ukiualunngortuni Kalaallit Nunaanniissimalerluni. Banki sullitanut privatinut inuussutissarsiortunullu siunnersuisarlunilu aningaasalersuisarpoq, inuiaqatigiinnilu akuuffigisamini eqeersimaartumik akisussaassuseqartumillu suleqataanissani pingaartitaralugu. Ukiuni kingullerni bankimi sullinneqarnissap ajornaallisarnissaa Bankivimmi immikkut aallunneqarsimavoq. Tamanna ilaatigut timitalerneqarsimavoq netbankimi periarfissanik nutaanik pilersitsinikkut kiisalu aningaasaliisarfimmik nersornaasigaasimasumik atuilernikkut. “Bankivimmi atorfininnissannut periarfissinneqarsimanera tulluusimaarutigaara. Isumaqarpunga banki inuiaqatigiinni akuunissaminut piukkunnartutut akisussaassusilittullu oqaatigineqarsinnaasoq, sullitamilu kissaataanik pisariaqartitaanillu paasinnittuusoq. Atorfimmi aallartinnissara suleqatissamalu pikkoreqisut suleqatigilernissaat qilanaareqaara. Bankip pikkoriffippassuisa ineriartorteqqinnissaanni suleqatigiinnissarput takorloorpara. Anguniagarput tassaassaaq sullitat privatit inuussutissarsiortullu pitsaanerpaamik sullinneqartuarnissaat, kiisalu Bankiviup sinerissamit tamarmit sullitanit nutaanit aamma ornigarneqartuarnissaa,” Anne Nivíka Grødem oqarpoq.
Paasissutissat sukumiinerusut Anne Nivíka Grødem, Bankivimmi landedirektørinngortussaq, tlf.: 560282 
Brian Smedemark, Bankivimmi forretningsdirektøri, tlf.: +298 230555