Ukiup sisamararterutaasa pingajuanni Bankivimmi angusat naammaginarput

Bankiviup ullumi ukiup sisamararterutaasa pingajuanni naatsorsuutit inerneri saqqummiuppai. Ataatsimut isigalugu naatsorsuutit ingerlalluarnermik siuariartornermillu takutitsipput. Ingerlatseqatigiiffiup naatsorsuutaasa inerneri akileraarutit sioqqullugit katillugit 80 mio. kr.-iupput.

”Ukiup sisamararterutaasa pingajuanni naatsorsuutit inerneri ajunngitsut saqqummiussinnaagatsigit naammagisimaarutigaarput. Ataatsimut isigalugu uninngatitat, taarsigassarsititsinerit, realkreditimillu taarsigassarsititsinerit siorna piffimmut tassunga naleqqiullugu tamarmik siuariarnermik takutitsipput. Piffimmi pineqartumi aamma appartitsinernik utertitsisimavugut, tamannalu aamma niuernikkut ingerlalluarnitsinnik, sullitattalu aningaasaqarnikkut inissisimalluarnerannik ersersitsisuuvoq. Kalaallit Nunaanni ingerlatsinitta inernerat qiviarutsigu 24 mio. kr.-inik inerneqarpoq, tamannalu naammagisimaarutigaarput,” Turið F. Arge, pisortaaneq oqarpoq.

Erniat appariartortut

Ukiormanna pisuni ilisarnaataasimasut ilaat tassaavoq erniat appariartornerat. Siorna augustimit ukiormanna augustimut erniat arfineq-marloriarlutik appartinneqarsimapput. Erniat appariartornerat pissutaalluni bankimi taarsigassarsinissaq akikillinikuuvoq. Taamaakkaluartoq erniat siumut taama akulikitsigisumik appariartuinnarnissaat naatsorsuutigineqanngilaq. Akerlianik niuerfimmi naatsorsuutigineqarpoq erniat aalajaannerusumik inissisimanissaat – imaassinnaavorli tamanna eqquutinngitsoq.

Naak erniat arlaleriarlutik appariarsimagaluartut Bankivimmi ileqqaagaqarluni aningaasanik suli erniortitsisoqarsinnaavoq. Ileqqaagaqalernissaq aamma ajornannginnerulernikuuvoq. Sullitat maanna nammineerlutik netbankikkut ileqqaagaqarfissaminnik pilersitsisinnaalernikuupput – nunatsinni sumiikkaluarunilluunniit.

Siunissaq pillugu ilimasaarutit

Ukiup sinnera pillugu ilimasaarutit ajunngeqaat, ukiormanna akileraarutit sioqqullugit naatsorsuutit inernerisa 235 – 265 mio. kr.-it nalaanniinnissaat bankimit suli naatsorsuutigineqarpoq. Kalaallit Nunaanni aningaasaqarneq ataatsimut isiginiaraanni siunissaq pillugu ilimasaarutit ajorpasinngillat. Taamaakkaluartorli aningaasaqarnikkut siuariartornerup kigaallannissaa naatsorsuutigineqarpoq.
”Naammaginartunik angusaqarnitta saniatigut aamma sullitatta ingerlalluarnerat siunissarlu pillugu inissisimalluarpasinnerat nuannaarutigaarput, ukiunut siuliinut naleqqiullugu piffissaq aggersoq aningaasaqarnikkut ineriartornerup kigaallannissaa naatsorsuutigineqarmat. Taamaakkaluartoq niuernerput sullitattalu inissisimanerat pillugu isumalluarpugut,” Turið F. Arge oqarpoq.

Ingerlatseqatigiiffiup naatsortuutaasa inerneri pingaarnersiukkat

  • Akileraarutit sioqqullugit inernerat 271 mio. kr.-iuvoq
  • Appartitsinerit sioqqullugit ingerlatsinerup inernera 193 mio. kr.-iuvoq
  • Bankip taarsigassarsisitsinera 9,6 mia. kr.-iuvoq
  • Bankip realkreditimik taarsigassarsisitsinera 2,8 mia. kr.-iuvoq
  • Bankip uninngatitai 10,8 mia. kr.-iupput

Paasissutissat sukumiinerusut

Rúna N. Rasmussen, marketingchef tusagassiorfinnullu attavissaq, tlf.: +298 230 478.