Bankivik Nunatsinni assammik arsartartunut pingaarnertut aningaasaliisunngorpoq

TAAK-p Bankiviullu aningaasaliinissamik isumaqatigiissutaat ukiuni pingasuni atuuttussaq Nunatsinni assammik arsartartunut tamanut atuuppoq – unammisartunit nukarlernit nunanut allanut unammisartut inersimasut ilanngullugit – nunalu tamakkerlugu unammisartunut illersuisunullu periarfissanik nutaanik pilersitsisussaalluni.

Bankivik TAAK-lu pingaarnertut aningaasaliisuunissamik isumaqatigiipput 2026-mi decembarimit 2029-mi novemberimut atuuttussamik. Bankiviup taamatut isumaqatigiissusiornermigut Kalaallit Nunaanni assammik arsarneq meeqqanut, inuusuttunut, inersimasunullu katersuuffiusaqisoq nukittorsarusuppaa.

”Assammik arsarnerup Nunatsinni isorartoqisumi innuttaasunik qanillisitsillunilu katersuuffiusarnera qasseeriarluta takoreerparput. Tassuuna immitsinnut qanillisarpugut, peqatigiilluta tulluusimaarutissaqalertarpugut, misigisassarpassuarnillu tunineqartarluta. Meerartatta inuusuttattalu peqatigiinnermik annertuumik pissarsiffigisarpaat, tassuunalu kivitseqatigiinneq, imminnut akisussaaffigeqatigiinneq, pissutsillu imaannaanngikkaluaraangata tunniutiinnannginnissaq ilikkartarpaat. Naleqartitat tamakku Bankivimmi pingaartitaraagut. Naleqartitammi tamakku unammisarfiup avataani aamma iluaqutaasarput, inuiaqatigiittullu ataqatigiinnitsinnut nukittorsaataallutillu patajaallisaataassallutik. Taamaammat Kalaallit Nunaanni assammik arsarnermut tapersersuinerput tulluusimaarutigaarput, timersornerullu Nunatsinni peqatigiinnernik nukittuunik pilersitsisarneranut ikorfartueqataarusulluta,” Anne Nivíka Grødem, Bankivimmi landedirektøri oqarpoq.

Aningaasaliineq nunamut tamarmut atuuttoq

Aningaasaliinermi assammik arsartartut tamarmik pineqarput – najukkami timersoqatigiiffinni meeqqat inuusuttullu, kiisalu nunanut allanut unammisartut arnat angutillu. Suleqatigiinnerup siammasissuunissaa Kalaallit Nunaannilu nunamut tamarmut nukittorsaataaniissaa Bankivimmi pingaartitaraarput, siunissamilu assammik arsartartussat pitsaasunik sinaakkuteqarnissaat immikkut pingaartitaralugu.

”Bankiviup Kalaallit Nunaanni assammik arsartartunut pingaarnertut aningaasaliisunngornera nuannaarutigalugu tikilluaqqungaarparput. Siammasissumik tapersersuerusuttumik aningaasaliisoqarnissaq assorsuaq pingaartipparput – unammisartunit nukarlernit nunanut allanut unammisartut ilanngullugit. Suleqatigiinnissatsinnut qilanaarpugut, naatsorsuutigaarpullu assammik arsarnermut pitsaasumik tunngaviliisuussasoq, nunalu tamakkerlugu meeqqanut inuusuttunullu suli amerlanerusunik periarfissiissasoq,” Jakob Larsen TAAK-meersoq oqarpoq.

Suleqatigiinneq eqeersimaarfiusoq inuiaqatigiinni iluaqutaasussaq

Pingaarnertut aningaasaliisuunermut atatillugu Bankiviup ilisarnaataa nunanut allanut unammisartut kiataanniilissaaq. Suleqatigiinnerulli siunertaa tassungaannaq killissanngilaq. Bankiviup TAAK-llu suleqatigiinnertik eqeersimaarfiutinniarpaat, unammisartullu illersuisullu ilaatillugit aaqqissuussinernik misigisassanillu aaqqissueqatigiittarniarlutik.

”Nuna tamakkerlugu inuit katersuuttarnissaat tapersersorusupparput. Taamaammat TAAK peqatigalugu unammisartut taakkualu avataanni tunniusimallutik ikiuuttartut katersorusuppavut, misigisassanillu peqatigiinnerannut nukittorsaataasussanik kinguaariillu tulliisa soqutigisaminnik suli aallussinerusinnaalernissaannut periarfissiisunik,” Anne Nivíka Grødem oqarpoq.

 

Misigisassanut nutaanut piareersimavugut

Aningaasaliinissamik isumaqatigiissut nutaaq arnat nunanut allanut unammisartut decembarimi Canadamut VM-imut anngunniuukkiartornissaannut atatillugu saqqummiunneqarpoq, 2027-mi VM-imut peqataanissaq pillugu anngunniuutissapput. Tamanna aamma Kalaallit Nunaat tamakkerlugu assammik arsarnermik nuannarisallit ataatsimoorlutik nunanut allanut unammisartuutivut tapersersorlugit misigisaqaqatigiinnissaannut periarfissaassaaq.

Isumaqatigiinnerup Bankivimmut kingunerissavaa ukiuni pingasuni suleqatigiinneq, Kalaallit Nunaanni assammik arsarnermut iluaqut

Bankivimmit neriuutigaarput isumaqatigiinneq ukiunik pingasunik sivisussuseqartoq Kalaallit Nunaanni assammik arsarnermut iluaqutaassasoq – unammisarfiup iluani timersornerullu avataani peqatigiinnerni tamalaani.