Ukiup sisamararterutaasa pingajuanni ineriartorneq ajunngilaq patajaallunilu

Bankiviup ullumi ukiup samararterutaasa pingajuanni naatsorsuutit inerneri saqqummiuppai, ataatsimullu isigalugu ingerlatseqatigiiffimmi maluginiagassani tamani ineriartorneq ajunngitsoq patajaatsorlu takussaavoq.

Ingerlatseqatigiiffimmi ineriartorneq ajunngitsoq ilaatigut uninngatitat, taarsigassarsisitsinerup kiisalu niuerutigisat annertussusaasa annertusiartorsimaneranni takuneqarsinnaavoq. Aammattaaq appartitsinernik utertitsisoqarpoq, tamannalu niuernikkut ineriartorluarnermut sullitallu ataatsimut isigalugit aningaasaqarnikkut patajaatsumik inissisimanerannut takussutissaavoq.

”Kalaallit Nunaanni niuernikkut ingerlatsinerput ukiormanna ulloq manna tikillugu akileraarutit peertinnagit 27 mio. kr.-inik pissarsiffiusimavoq, tamannalu naammagisimaarutigaarput, ingammik sullitat pillugit unammillerneqangaatsiarnera eqqarsaatigissagaanni. Isumaqarpugut Kalaallit Nunaanni niuerfimmi pitsaasumik unammillertoqarnissaata suleqataaffiginissaa pingaaruteqartoq, sullitat privatit inuussutissarsiortullu akitigut atugassatigullu orniginartunik periarfissaqartitaaniassammata. Tassunga ilanngullugu niuerfimmi periarfissat nittarsaakkusuppavut, sullitavullu kikkulluunniit kajumissaarusuppavut piffimmit piffimmut aningaasaqarnertik pisariaqartitaminnut kissaatiminnullu piukkunnarnerpaamik suli aaqqissuussaaqqanersut eqqumaffigeqqullugu. Inuttaanut tulluarsakkamik siunnersuinissatsinnut piareersimajuarpugut, siunnersuigaangattalu suna tamarmi ataatsimut isiginiartarparput, sullitarlu issiaqatigalugu periarfissat tassunga tulluarnerpaasut ujartortarlugit,” Turið F. Arge, pisortaaneq, oqarpoq.

 

Piffissami aggersumi erniat qaffakkiartornissaat

Ukiormanna erniat qaffakkiartornerat takussaasimavoq. Erniat augustimi qaffanneqarput, qaammatillu siuliata naalernerani kingullermik qaffanneqarlutik. Erniat qaffannerisa kinguneraat aningaasanik taarsigassarsinerup akitsornera. Akerlianilli uninngatitanut erniat aamma qaffannikuupput, taamaasillutillu sullitat ileqqaagaat erniorluarnerulersimallutik.

Niuerfimmi naatsorsuutigineqarpoq ukiumi aggersumi erniat marloriarlutik qaffaavigineqaqqissasut.

Naak erniat qaffannerisa taarsigassarsiarisimasat akitsornerinik kinguneqaraluartoq bankip sullitaasa taarsigassarsiatik suli akilersinnaalluarpasippaat. Tamatumunnga takussutissaapput akiligassat akilinngitsuukkat sippuillunilu atuinerit allanngorsimanngimmata.

Ingerlatseqatigiiffik nutaamik periusissiorsimavoq

Ingerlatseqatigiiffiup ukiup sisamararterutaasa pingajuanni naatsorsuutimi inernerinik saqqummiussinera ilutigalugu siulersuisut periusissiamik nutaamik ukiuni aggersuni sisamani atuuttussamik akuersisimapput. Ataatsimut isigalugu periusissiaq nutaaq ingerlatseqatigiiffiup suliai siuliini pisimasut tunngavigalugit, patajaatsumik tunngavissaqarluni, sanarfineqassaaq.

”Periusissiaq nutaaq pigileratsigu maanna ersarissumik siunertarilerparput uatsinni sullinneqarneq pitsaanerullunilu ajornannginnerussasoq. Assersuutigalugu 2030-mi uatsinni sullitanngorniaraanni 10 minutsinit sivisunerussanngilaq, taarsigassarsiniarlunilu qinnuteqaraanni nal. ak. ataatsip iluani akissutisisoqarsinnaassalluni. Tassunga ilanngullugu pingaaruteqarpoq inummut pineqartumut tulluarsakkamik qanilaartumillu siunnersuinitta, sullitatta pisariaqarteqisaata, attatiinnarnissaa,” Turið F. Arge, pisortaaneq, oqarpoq.

Tassunga ilanngullugu periusissiap nutaap siunertaraa Savalimmiuni Kalaallit Nunaannilu sulisutta suleqatigiinnerata qanereeqisup suli pitsanngorsarneqaqqinnissaa. Kalaallit Nunaanni Bankivimmi sulisutta pikkorissut saniatigut ingerlatseqatigiiffissuuvugut 200-t sinnerlugit sulisulik.

”Suleriaatsitsinni Kalaallit Nunaanni najukkami ilisimannilluartut Savalimmiunilu ukiuni 120-ni misilittakkat, pikkoriffiit, suliaqarfinnilu assigiinngitsuni ilisimasat kattuttarpavut. Ullut tamaasa inuussutissarsiortunik siunnersortivut Nuummiittut Tórshavnimiittullu qanimut suleqatigiittarput, nunallu killingi qaangerlugit ilisimasanik misilittakkanillu avitseqatigiittarlutik. Taamaasillutik inuiaqatigiit marluk amerlasoorpassuartigut assingusunik periarfissaqarfiullutillu aporfeqarfiusut imminnut attaveqartittarpaat – nunanillu taakkunannga marlunnit ilisimasat, misilittakkat, isummersornerillu sullitatsinnut inuussutissarsiortunut ingerlateqqittarlugit. Kalaallit Nunaannit Savalimmiunillu suleqatigiinnerit sullitatsinnut iluaqutaasimaqisut assigiinngitsorpassuit takussaalereerput, suleqatigiinnerullu suli nukittorsarneqarnerulluni sullitatsinnut inuussutissarsiortunut tamanut iluaqutaanissaa qilanaaraarput,” Turið F. Arge, pisortaaneq, oqarpoq.

 

Ingerlatseqatigiiffiup naatsortuutaasa inerneri pingaarnersiukkat

  • Akileraarutit sioqqullugit inernerat 187 mio. kr.-iuvoq
  • Appartitsinerit sioqqullugit ingerlatsinerup inernera 164 mio. kr.-iuvoq
  • Bankip taarsigassarsisitsinera 9,9 mia. kr.-iuvoq
  • Bankip realkreditimik taarsigassarsisitsinera 3 mia. kr.-iuvoq
  • Bankip uninngatitai 11,6 mia. kr.-iupput

Bankimi siulersuisut naatsorsuutigaat ingerlatseqatigiiffimmi ineriartorneq ajunngitsoq ukiup sinnerani ingerlaannassasoq, ilimasuutigaallu 2026-mi akileraarutit ilanngaatereerlugit naatsorsuutit inernerat 225-255 mio. kr.-ip nalaaniissasoq.

 

Paasissutissat sukumiinerusut

Kára Bjarnadóttir Jakobsen, attaveqaqatigiinnermut siunnersorti tusagassiorfinnullu attavissaq, tlf.: +298 230 473.